भूमे पर्वको शुभकामना
असार १, २०७८
असार १, २०७८
भूमे पर्वको अवसरमा स्वदेश तथा विदेशमा रहनु
भएका समस्त खामभाषी मगर समुदाय लगायत सबै नेपाली दाजुभाइ तथा दिदीबहिनीहरुमा सुख, शान्ति, समृद्धि, सुस्वास्थ्य र
उत्तरोत्तर प्रगतिकोे हार्दिक शुभकामना व्यक्त गर्दछु ।
भूमे पर्व रोल्पा र रुकुमका खामभाषी मगर
समुदायले मनाउने लुम्बिनी
प्रदेशको विशेष सांस्कृतिक पर्व हो । विविधतायुक्त नेपाली समाजमा जाति र समुदायले
मनाउने पर्वले एकता, सद्भाव र मेलमिलापको वातावरण बनाउन भूमिका खेलेका छन् ।
भूमे पर्व मार्फत खाम संस्कृतिको पहिचान र
संरक्षणमा सघाउ पुगेको छ । खाम संस्कृति समुदाय र क्षेत्र विशेषको मात्रै नभएर
नेपाली समाजको महत्वपूर्ण संस्कृतिको रुपमा पहिचान स्थापित भएको छ । भूमे पर्व
प्रकृतिसंग सम्बन्धित छ । यसले प्रकृति र मान्छेबीचको गहिरो सम्बन्ध उजागर गरेको छ
। प्रकृतिले हामीलाई दिएका अमूल्य उपहार माटो,पानी,जीवजन्तु र रुखविरुवाको संरक्षण र सही उपयोग
गर्न सक्दा मात्रै हाम्रो जीवन सरल र सहज रुपमा अघि बढ्न संभव छ । प्रकृतिप्रति
माया र संरक्षण गर्दा भावी पुस्ताका लागि अमुल्य उपहार हुन्छन् ।
संघीय लोकतान्त्रिक गणतन्त्र नेपालको संविधानले
सबै जाति र समुदायको उत्थान र विकासमा जोड दिएको छ । अल्पसंख्यक, आदिवासी, जनजाति र पछाडि
पारिएका जाति तथा समुदायको उत्थानका लागि संवैधानिक रुपमै आयोग गठन गर्ने व्यवस्था
गरेर सबैप्रति सम्मान व्यक्त गरेको छ । प्रदेश सरकारले भूमे पर्वको सांस्कृतिक
महत्वलाई सम्मान गर्दै आज असार १ गते रोल्पा र रुकुममा स्थानीय बिदा दिने निर्णय
गरेको छ । लोकतन्त्रलाई सबै समुदाय र वर्गका नागरिकको जीवनपद्दती बनाउन खोजिएको छ
।
मुलुक यतिखेर संविधान कार्यान्वयनको महत्वपूर्ण
दिशामा अघि बढेको छ । तीन तहका सरकारले संवैधानिक व्यवस्था अनुसार तहगत सरकारको
अभ्यास गरी संविधानको व्यवहारिक कार्यान्वयन गर्दै अघि बढेका छन् । संविधानको
कार्यान्वयन हुँदै जाँदा सबै समुदाय, वर्ग र जातिले व्यवहारिक रुपमा प्राप्त
अधिकारको उपभोग गर्दै जाने वातावरण बन्ने छ । संविधान कार्यान्वयन गर्दै सरकार
समृद्ध नेपाल, सुखी नेपालीको अभियानमा अघि बढेको छ । विकास र समृद्धिको बाटोबाट न्यायपूर्ण र
समतामुलक समाज निर्माणका लागि हामी प्रतिबद्ध रहँदै अघि बढेका छौं । समृद्ध नेपाल,सुखी नेपालीको
लक्ष्यमा पुग्न प्रदेश सरकार योजनाबद्ध विकास मार्फत समृद्ध प्रदेश,खुसी जनताको
लक्ष्य लिएको छ ।
यतिबेला हामी कोरोना भाइरस कोभिड—१९ विरुद्धको
संघर्षमा केन्द्रित छौं । नागरिकलाई कोरोना भाइरसको संक्रमणबाट जोगाउन र
संक्रमितको उपचारलाई प्रभावकारी बनाउन सरकार क्रियाशिल छ । सरकारको यो अभियानमा
नागरिकको सार्थक सहयोग आवश्यक छ । नागरिकको सहयोगले नै कोभिड–१९ विरुद्ध सरकारले
चालेका कदम प्रभावकारी बन्न संभव भएका हुन् । संक्रमित र उपचारमा अहोरात्र खटिएका
स्वास्थ्यकर्मीको मनोबल बढाउन सहयोग गरौं । सबैको सार्थक सहयोगबाट नै महामारीलाई
जित्न सकिन्छ ।
अन्त्यमा, भूमे पर्वको अवसरमा सबैमा हार्दिक शुभकामना व्यक्त गर्दछु ।
शंकर पोखरेल
मुख्यमन्त्री
असोज २४, २०७७
असार २९, २०७७
असार २९, २०७७
असार ११, २०७७